किती वेळ अभ्यास हे ठरवायचं कसं?

 नेमका किती वेळ, किती तास किंवा किती मिनिटं अभ्यास करायला पाहिजे असं उत्तर कोणी देऊ शकत नाही. कारण त्याचं उत्तर रोज आणि प्रत्येक मुलाप्रमाणे वेगळं असतं. पहिली गोष्ट म्हणजे रोज शाळेतून दिलेला गृहपाठ पूर्ण केला पाहिजे. कारण तो गृहपाठ केल्यानं आपल्याला त्या दिवशी शिकवलेला अभ्यास चांगला समजतो. त्याची उजळणी होते. दुसरी गोष्ट म्हणजे शाळेत त्या दिवशी जो धडा किंवा जे प्रकरण शिकवलं असेल, त्याची घरी येऊन एकदा उजळणी किंवा वाचन केलं पाहिजे. तिसरी गोष्ट म्हणजे शाळेतून जे प्रकल्प करायला सांगितलेले असतील, त्याचं काम आपण वेळेवर केलं पाहिजे. काही वेळा ते प्रकल्प एक आठवड्यात पूर्ण करायचे असतात. त्यासाठी रोज थोडं काम करावं लागणार असतं. पण आपण काय करतो, की आठवडाभर काहीच करत नाही आणि मग शेवटच्या दिवशी आपली धावपळ होते आणि मग आपण घरातल्या सगळ्यांना त्यासाठी कामाला लावतो. असं करणं काही योग्य नाही. आपण शाळेतून दिलेला रोजचा अभ्यास रोज पूर्ण करणं, त्याचे व्यवसाय पूर्ण करणं हे महत्त्वाचं असतं