मुलांना सर्व कळतं हे मोठ्यांना कधी समजेल की नाही?

We Are Responsible या मराठी शॉर्ट फिल्ममधली दोन्ही मुलं खूप छोटी आहेत. पण दोघांची परिस्थिती खूपच वेगळी. आपल्या या मैत्रिणीच्या बाबांकडे कपडे फाटले असले तरी नवीन घेण्यासाठी पैसे नाहीत, मुलीचं शाळेचं दप्तर फाटलेले असते तरी नवीन दप्तर आपण घेवू शकू की नाही याची त्यांना खात्री नसते. अशा गोष्टी वाचून, पाहून  आपल्याला किती वाईट वाटतं ना. प्रत्यक्षात कोणी असे गरजू  दिसले तर लहान मुलं त्यांची इच्छा असूनही मदत करू शकत नाहीत. कारण त्यांचे आई-बाबा त्यांना परवानगी देत नाहीत. तुम्ही मोठ्या माणसांबरोबर जेव्हा खरेदीला जात असाल तेव्हा शोरूम, मोठ्या मॉलमधली खरेदी करताना ते हजारो रुपये देतात, तिथे  पैसे कमी करा, असे म्हणत नाहीत. पण भाजीवाल्यांची-फळवाल्यांची गाडी असो, चप्पल दुरुस्त करून देणारे असोत... अशा ठिकाणी मात्र शंभर रुपये बिल झालेले असले तर काही मोठी माणसं साठच किंवा पन्नासच देतो, थोडे पैसे कमी करा, परवडत नाही, असे म्हणतात. हे तुमच्यासारखी मुलं बघत असतात, मोठी माणसं चुकत आहेत असं वाटतं, पण बोलता येत नाही. असं बरेचदा होतं. कष्ट करणाऱ्या माणसांना त्यांचे पैसे व्यवस्थित मिळायला पाहिजेत, असं  लहान मुलांनाही वाटतं.  त्यांच्या मनात विचार सुरु होतात.