स्पेसवाॅक करताना अंतराळवीरांच्या हातातून निसटली टूलकिट बॅग!

आपण आई वडिलांबरोबर कुठे बाहेरगावी फिरायला जातो तेव्हा किती मज्जा येते ना? पण समजा प्रवास करताना आपली बॅगच हरवली तर..? मग काय सगळ्यांचाच मूड जातो. ती बॅग शोधण्यातच इतका वेळ जातो की फिरण्याचा वेळ वाया जातो. त्यातही हरवलेली बॅग मिळाली तर ठीक नाहीतर हळहळत घरी यावं लागतं. हे फक्त इथे आपल्या बाबतीतच होतं असं नाही तर अवकाशात अंतराळवीरांच्या बाबतीतही हे घडतं. मग काय होतं, ते काय करतात? हे समजून घेण्यासाठी अवकाशात नुकत्याच झालेल्या एका घटनेकडे पाहायला हवे.  ही घटना घडली ती पृथ्वीपासून ४०० किमी अंतरावर असलेल्या इंटरनॅशनल स्पेस स्टेशनमध्ये. या स्पेस स्टेशनच्या बाहेर येवून नासाचे अंतराळवीर जॅस्मीन मोघबोली आणि लोरल ओहारा स्पेस वाॅक करत होते. स्पेस स्टेशनची देखभाल दुरुस्ती करण्याच्या मिशनवर हे दोन अंतराळवीर स्पेस स्टेशनच्या बाहेर येवून स्पेस वाॅक करत होते. हे काम करण्यासाठी त्यांना अनेक तास लागतात. देखभाल आणि दुरुस्ती करण्यासाठी त्यांच्याकडे एक स्पेस टूल किट होते. स्पेसवाॅक करताना नेमकं हे टूल किट या अंतराळवीरांच्या हातून निसटलं आणि पडलं.