आजारी मुलांना आनंदी करण्यासाठी कॅम्पबेलकडे आहे टेडी बेअरचा उपाय!

दवाखान्यात आजारांवर उपचार घेणाऱ्या मुलांसाठी टेडीबेअर तयार करणाऱ्या कॅम्पबेलवर आपल्या वडीलांसाठीही टेडीबेअर तयार करण्याचा प्रसंग आला. कॅम्पबेलच्या वडिलांना कॅन्सरचं निदान झालं आणि त्यांच्यावर औषधोपचार सुरु झाले. घरात सर्वजण तणावात होते, पुढे काय होईल या विचाराने घाबरलेले होते. पण कॅम्पबेल मात्र शांत होता, आपले वडील पूर्ण बरे होतील याबाबत आशावादी होता. हा आशावाद त्याला त्याच्या टेडीबेअरनेच दिला होता. त्याने आपल्या कॅन्सरने आजारी वडिलांसाठी ' विनर' नावाचं टेडीबेअर तयार केलं ते टेडीबेअर त्याने आपल्या वडिलांना भेट म्हणून दिलं. कॅम्पबेलने तयार केलेलं टेडीबेअर जेव्हा वडिलांनी पहिल्यांदा हातात घेतलं तेव्हा त्यांच्यात पहिल्यांदा उठून पुन्हा कामाला लागण्याची उमेद निर्माण झाली.

कॅम्पबेलमध्ये आणि तो तयार करत असलेल्या टेडीबेअरमध्ये इतरांना दु:ख विसरायला लावण्याची जादू होती. कॅम्पबेलचे हे टेडीबेअर तयार करणं, ते दवाखान्यातील आजारी मुलांना वाटणं या कामाची चर्चा व्हायला लागली. वर्तमानपत्रात, टेलिव्हिजनवर यासंबंधीच्या बातम्या येवू लागल्या. ऑस्ट्रेलियन टेलिव्हिजनवर जेव्हा कॅम्पबेलच्या टेडीबेअरची बातमी आली तेव्हा कॅम्पबेलचं नाव जगभरात पोहोचलं. त्याचं काम जगाला समजलं. यानंतर आपल्या कामाला कॅम्पबेलने संस्थेचे स्वरुप दिले. त्याने 'प्रोजेक्ट ३६५' नावाची संस्था सुरु केली. जगभरातून कॅम्पबेलला आजारी मुलांसाठी टेडीबेअर तयार करण्यासाठी आर्थिक मदत येवू लागली. आता कॅम्पबेल फक्त आपल्या शहरातल्या आणि देशातल्याच आजारी मुलांसाठी टेडीबेअर बनवत नाही तर जगभरतल्या आजारी आणि संकटात सापडलेल्या मुलांना दिलासा आणि आनंद देण्यासाठी टेडीबेअर तयार करतो. कॅम्पबेलचे टेडीबेअर आता इतके लोकप्रिय झाले आहेत की त्याचा लिलावही अनेक ठिकाणी केला जातो. या लिलावातून जो पैसा जमा होतो तो कॅन्सरसारख्या दुर्धर आजारांशी लढणाऱ्या मुलांच्या पालकांना त्यांच्या उपचारासाठी मदत म्हणून दिला जातो.