मनापासून चित्र काढण्याची आवड असणाऱ्या अचूवर आई का चिडते?

कधी कधी लहान मुलांना काय आवडतं, ते मोठ्या माणसांना कळतच नाही. आपल्याला वाटतं, आई-बाबा असे का वागतात? आई-बाबांना वाटतं की, आपण जे सांगू तेच मुलांनी केलं पाहिजे. असं असलं की निराश व्हायला होतं. अशीच ही गोष्ट आहे, आपल्या चित्रकार मित्राची. अचूची! हा आपला मित्र चित्र काढण्यात अगदी रंगून जातो. त्याला चित्र आणि रंगकामापलीकडं काहीच दिसत नाही. आजूबाजूला कोण आहे, हेसुद्धा बरेचदा कळत नाही. आपलंही तसंच होतं. आवडती गोष्ट करताना आपण मनापासून करतो की नाही? तसंच त्याचं आहे.

अचूच्या आईला एक फोन येतो. फोनवरच्या व्यक्तीला ती सांगते, आमच्या अचूला ना चित्रं काढायला आवडतात. पण आमची इच्छा आहे की, त्यानं मोठं डान्सर व्हावं. त्याला आम्ही डान्सच्या क्लासला घातलं होतं; पण तो गेलाच नाही. त्यामुळं फी वाया गेली. आपलंही कधी कधी असं होतं. दुसऱ्या कुणाचं ऐकून किंवा स्वतःची आवड म्हणून आई-बाबा एखाद्या क्लासला घालतात, मग तो कधी कोणत्या खेळाचा असतो, भाषेचा असतो किंवा कला प्रकाराचा असतो. पण तिथं आपलं मन रमतंच असं नाही. मग कंटाळा येतो. आणि क्लास आवडत नाही म्हणून आपणही दांड्या मारतो. तसंच आपल्या अचूचं झालंय.