मैत्रिणीच्या कपड्यावर लाल डाग दिसतो तेव्हा तुम्ही काय करता?

तुमच्यासारख्याच एका किशोरवयीन मुलाची ही गोष्ट. त्याला आपण समीर म्हणूया. तो राहायचा त्या सोसायटीत त्याच्या वयाची खूप मुलं-मुली होती. लहानपणी सगळे एकत्रच धुडगूस घालायचे. पण आजकाल मात्र त्यांचा फक्त मुला-मुलांचा ग्रुप झाला होता. मुली जरा वेगळ्या, घोळक्यानं गप्पा मारत असायच्या.

समीरची आणि तनिशाची शाळा एकच होती, ते एकाच व्हॅननं जायचे. त्यादिवशी इतर सगळ्या शाळांना सुट्टी होती. त्यामुळे ते दोघंच व्हॅनची वाट बघत उभे होते. इकडे तिकडे बघत असताना एकदम समीरच्या लक्षात आलं की तनिशाच्या युनिफॉर्मच्या स्कर्टला लालसर डाग पडलाय. आधी त्याला काही कळलंच नाही. मग त्याला आठवलं. त्याची ताई एकदा शाळेतून लवकर घरी आली होती, तेव्हा तिच्याही स्कर्टला डाग पडला होता. ती खूप घाबरून, गोंधळून गेली होती. आई तिला आत घेऊन गेली होती आणि मग बऱ्याच वेळानं त्या दोघी बाहेर आल्या होत्या. समीरच्या चेहऱ्यावरचं प्रश्नचिन्ह बघून आईनं त्याला जवळ घेऊन त्यावेळी काही माहिती दिली होती. ती त्याला आत्ता आठवली.