गणपतीपुळ्याच्या समुद्र किनाऱ्यावर एक बेबी व्हेल येतो तेव्हा!

आपण छान दिवाळीचा, दिवाळीच्या सुट्यांचा आनंद घेत होतो, मित्रांसोबत मैदानावर खेळत होतो, कल्ला करत होतो, दंगा करत होतो, मस्त दिवाळीचा फराळ खात होतो, आई मला हेच हवं, तेच हवं असा हट्ट करत होतो, टी.व्हीवर वर्ल्डकपच्या मॅच बघत होतो तेव्हा कोकणात गणपतीपुळ्याच्या समुद्रावर काहीतरी वेगळंच घडत होतं. १३ नोव्हेंबरला म्हणजे लक्ष्मी पूजन झालं त्याच्या दुसऱ्या दिवशी गणपतीपुळ्याच्या समुद्रकिनाऱ्यावर एक देवमाशाचं पिल्लू म्हणजे बेबी व्हेल वाळूत अडकलेलं आढळलं. सुरुवातीला अनेकांना वाटलं हा देवमासा मेलेलाच आहे की काय? पण लोकांनी थोडं जवळ जावून पाहिलं तेव्हा लक्षात आलं की हा बेबी व्हेल तर जिवंत आहे. पण त्याला काहीतरी होतंय. त्याच्या अंगात अजिबात त्राण नाहीये. या बेबी व्हेलला परत समुद्राच्या पाण्यात सोडलं, ते जर पुन्हा त्याच्या आईला भेटलं तर हा बेबी व्हेल नक्की बरा होणार असं सगळ्यांनाच वाटलं. मग या बेबी व्हेलला पुन्हा समुद्रात, त्याच्या आईकडे पाठवण्याचे प्रयत्न सुरु झाले. यासाठी गावातील लोकं, तिथे फिरायला आलेले पर्यटक, निसर्गप्रेमी माणसं आणि मत्स्यशास्त्रज्ञांनी खूप प्रयत्न केलेत.