मागेल त्याला पौष्टिक खाऊ देणारी सरयूची व्हेंडिगो मशीन कसं काम करते?

आपल्याला जेव्हा भूक लागते तेव्हा आपण लगेच आईकडे खाऊ मागतो. आई बाबा घरी नसले, आपण घरात एकटे असलो आणि तेव्हा आपल्याला भूक लागली असेल तरी आपण स्वयंपाकघरात जावून खाऊच्या डब्यातून खाऊ घेऊ शकतो. भूक लागली आहे आणि आपल्याला खायलाच नाही असं आपलं कधी होत नाही. पण आपल्या आजूबाजूला अशी माणसं त्यात आपल्याएवढी, आपल्यापेक्षा लहान मुलंही आहेत ज्यांना भूक लागल्यावर लगेच खायला मिळत नाही. भूक लागली आहे आणि खायलाच नाही ही परिस्थिती किती भयंकर असते ना! अमेरिकेत लाॅस एंजलीस येथे राहणाऱ्या सरयू कोचारलाकोटाने अशी परिस्थिती असलेली माणसं तिच्या आजूबाजूला पाहिलीत. आपण दोन तासही भुकेले राहू शकत नाही,आणि ज्यांना घर नाही, जी माणसं रस्त्यावर राहतात ती माणसं तासनतास कशी बरं उपाशी राहात असतील? हे पाहून सरयूला वाईट वाटायचं. अन्नाची असुरक्षितता हा फक्त काही लोकांचा नाही तर जगभरातला मोठा प्रश्न आहे. आपण यासाठी काही मदत करायला हवी असं तिला वाटलं. सरयूची ही इच्छा इतकी तीव्र आणि मनापासून होती की तिने खरोखर एक उपाय शोधला. तिने गरजूंना, उपाशी लोकांना ते मागतील तेव्हा अन्न देणारे एक मशीन शोधून काढले. 'व्हेंडिगो' हे त्याचं नाव.