हवामानात बदल झाल्याने आपल्यावर आणि पशू- पक्ष्यांवर काय संकट येईल?

 १. हवामान बदलाने वातावरण, पर्यावरण, प्राणी, शेती यावर होणारा परिणाम मनुष्याच्या जगण्यवरही दिसत आहे. वाढत्या तापमानामुळे शेती अनिश्चित झाली आहे. शेतीचा कस ज्या मातीवर अवलंबून असतो, त्या मातीचा दर्जा खालावला आहे. जमीन सुपीक करणारी, पिकं जगवणारी, वाढवणारी मातीतली आर्द्रता , खनिजं कमी झाली आहेत. त्यामुळे शेती पिकवताना किड नियंत्रण करणं शेतकऱ्यांना अवघड जात आहे. शेतकऱ्यांना शेती करणं खर्चिक होवू लागलं आहे. परिणामत: शेतकऱ्यांचं जगणं धोक्यात आलं आहे. एखादा दुष्काळ किंवा पुरामुळे शेतकऱ्यांचं प्रचंड नुकसान होवून त्याला स्वत:लाच खायला अन्न मिळत नाहीये. शेतीतल्या अनिश्चितता आणि अनियमिततेचा परिणाम फळं, भाज्या यावर आधारित अन्न प्रक्रिया उद्योगांवरही होत आहे. यामुळे या उद्योगांवर अवलंबून असलेलं मनुष्यजीवन तर धोक्यात आलं आहेच सोबतच जगभरात अन्नाचा तुटवडाही यापुढच्या काळात जाणवू लागणार आहे, असं अभ्यासक म्हणतात.

२. हवामान बदलामुळे दुष्काळ, पूर, त्यातून होणारे अपघात, मृत्यू, अन्न टंचाई, त्यातून निर्माण होणारी युध्द्दजन्य परिस्थिती गंभीर होत आहे.

३. हवामान बदलाने हवेची गुणवत्ता खराब झाली आहे. वातावरण गरम झाल्याने जंगलांना लागणाऱ्या वणव्यांचा धूर, ओझोनचे धुके हवेत मिसळत आहे. त्याचा परिणाम मानवी आरोग्यावर होत आहे. अशी हवा दमा आणि ह्रदय विकार असलेल्या रुग्णांसाठी घातक ठरत आहे. मलेरिया, झिका यासारखे विषाणूजन्य आजार वाढत आहे. यापुढे अशा आजारांचा धोका आणखी तीव्र होत जाणार आहे.