“गारवडीच्या मुलांची खासियत न्यारी, फुलवली सुंदर परसबाग शिक्षणाच्या द्वारी”

बीज अंकुरे अंकुरे ओल्या मातीच्या कुशीत, कसे रुजावे बियाणे माळराणी खडकात याचा प्रत्यय विद्यार्थ्यांनी प्रत्यक्षात घेतला.

• परिस्थिती कोणतीही असो, जीवनात कितीही खाचखळगे असो, कितीही अडचणी असो, प्रबळ इच्छाशक्ती, चिकाटी, सातत्य आणि प्रामाणिक प्रयत्न असले की मार्ग निघतो, कष्टाचे फळही मिळतेच हा संदेश मुलांपर्यंत गेला. आता आमचे विद्यार्थी उत्तम पद्धतीने सेंद्रिय शेती करत आहेत. हे कौशल्य त्यांना आयुष्यभर पुरणारी संस्कारांची शिदोरीच आहे. 
• शालेय अभ्यासक्रमातील विविध संकल्पना प्रत्यक्ष अनुभवातून स्पष्ट होण्यास मदत झाली. 
• शालेय पोषण आहारासाठी सेंद्रिय भाजीपाला मिळू लागला. आहाराची पौष्टिकता वाढली. परसबागेच्या माध्यमातून विषमुक्त, सेंद्रिय शेतीचा उपक्रम ग्रामस्थांनाही बघायला मिळाला. दशपर्णी अर्क, जीवामृत, गंध सापळे, चिकटसापळे या नावीन्यपूर्ण बाबींचा उपयोग शेतकऱ्यांनी त्यांच्याही शेतात करण्यास सुरुवात केली. 
• विद्यार्थ्यांनी पालकांच्या मदतीने स्वयंप्रेरणेने घरी सेंद्रिय परसबाग तयार करण्यास सुरुवात केली आहे. त्यामुळे ही केवळ केवळ परसबाग नाही, तर विद्यार्थ्यांच्या हिरव्या स्वप्नांना पंख देणारी प्रयोगशाळाच आहे. शाळा म्हणजे केवळ अभ्यासाचे केंद्र नाही तर नवकल्पना फुलवणारी प्रयोगशाळा आहे. आमच्या शाळेचे परसबागेने हे सिद्ध करून दाखवले आहे. ही एक हरित यशोगाथा आहे अशी सकारात्मक भावना निर्माण झाली.