बदलत्या फॅशनप्रमणे अपटूडेट राहिलं तर त्रास होतो. पण कोणाला?

जॉर्डन्सचे नवीन आलेले शूज असू देत नाही तर स्टॅन स्मिथ्सची लिमिटेड एडिशन… बाजारात जे काही नवीन येईल ते सगळं आपल्याला पाहिजे असतं. मीपण असे उगाच काही जोड घेतले असतीलच. पण मग मला वाटलं,”इतके सगळे बूट चपला घेणं आपल्याला परवडतं, पण आपल्या पृथ्वीला ते परवडणार आहे का?” अभ्यास असं सांगतो, की कपड्यांची फॅशन आणि बूट चपलांचे जोड हे वातावरणाचं सगळ्यात जास्त नुकसान करणाऱ्या घटकांपैकी दोन आहेत. या दोन्हीमुळे प्रचंड प्रमाणात कचरा, कार्बनडायऑक्साईडचं उत्सर्जन आणि जलप्रदूषण होतं.

स्पोर्ट्स शूज बनवतांना रबर, फोम आणि प्लॅस्टिकसारखी पेट्रोलियम उत्पादनं वापरली जातात. कुठल्याही प्रकारची पेट्रोलियम उत्पादनं तयार करतांना हरितगृह वायू आणि इतर प्रदूषण करणारे घटक हवेत सोडले जातात. त्याशिवाय या सर्व उत्पादनांची साठवणूक आणि वाहतूक करण्यातही मोठ्या प्रमाणात कार्बनडायऑक्साईड वायूचं उत्सर्जन होतं. जगात सगळ्यात जास्त पाणी वापरणारा हा दुसऱ्या क्रमांकाचा उद्योग आहे.