सर्दीमुळे आवाज बसतो, बदलतो! सर्दीचा आवाजावर परिणाम का होतो?

आपल्या घशामध्ये जिभेच्या अगदी मागच्या टोकापाशी आपलं स्वरयंत्र असतं. या स्वरयंत्रातून आपल्या आवाजाची निर्मिती होते. स्वरयंत्रामधून येणारा आवाज हा त्यात असणाऱ्या स्वरतंतूंच्या कंपनांमुळे होतो. काही विशिष्ट शब्दोच्चारांसाठी घसा, जीभ, दात आणि ओठ यांचासुध्दा उपयोग स्वरयंत्राबरोबर केला जातो.

आपल्याला जेव्हा सर्दी होते, तेव्हा श्वासनलिकेत आणि त्याचबरोबर स्वरयंत्रात आणि स्वरतंतूंवरही शेंबडाचा थर चढतो. स्वरयंत्र आणि घसा साफ करण्यासाठी खोकला येतो. जोरजोरात खोकल्यामुळे स्वरतंतूंना इजा होते आणि ते सुजतात. जंतूंच्या संसर्गाने, काही रसायनांच्या वाफेमुळे आणि धुळीमुळेही स्वरतंतूंना इजा होते. नाकात आणि नाकाच्या बाजूला असणाऱ्या पोकळ्यांमध्येही शेंबूड साठतो. या पोकळ्यांना ‘सायनस’ म्हणतात. त्यामुळे आवाजाची, शब्दोच्चाराची नेहमीची प्रक्रिया आपल्याला नीट करता येत नाही. त्यामुळे आवाज बदलतो.