चला वाघासारखं वागूया. दबा धरुन बसूया.सावजाच्या मागे जाऊया!

वाघ. या प्राण्याचं नाव घेतल्याबरोबर लगेच आपल्यातही शक्ती संचारल्यासारखी वाटते की नाही? वाघ आहेच तसा बलदंड. काय त्याची चाल, काय त्याचा रुबाब.. त्याच्या नुसत्या एका डरकाळीनं सगळ्यांची पाचावर धारण बसते. वाघाचा पंजा ही त्याची मुख्य ताकद. लहान आकाराच्या प्राण्यांना त्यानं एक दणका दिला तर त्यांची कवटी फुटून ते जागच्या जागी ‘राम’ म्हणू शकतात!

वाघांचे अनेक प्रकार असतात. लहान, मोठे. आपल्याकडे आढळणारा वाघ साधारण दोनशे किलो वजनाचा असतो, मादी मात्र वजनानं कमी असते. प्रत्येक वाघानं आपलं क्षेत्र ठरवून घेतलेलं असतं आणि साधारण साठ ते शंभर चौरस किलोमीटर परिसरात त्याचं राज्य चालतं. दुसऱ्या वाघांनाही तो आपल्या इलाक्यात येऊ देत नाही. एका झटक्यात ताशी ६५ किलोमीटर वेगानं तो चाल करून जाऊ शकतो आणि एका ढांगेत तब्बल पाच ते सहा मीटरचं अंतरही कापू शकतो.