बोली भाषेत बोला आणि मराठी भाषा चांगली करा! काय आहे हा उपक्रम?

'जागर बोलीचा आदर मराठीचा' या नावानं आम्ही मराठीभाषा विषयक मुलांचा समूह तयार केला. विदर्भातील अनेक लेखक,कवी,कवयित्री मला माहीत होते. लेखकांचे वाढदिवस किंवा जयंती-पुण्यतिथीचं औचित्य साधून त्या आठवड्यात त्या त्या लेखकांचे साहित्य शोधून व्हाॅट्सअप ग्रूपवर टाकायचे. यामुळे मुलांना मराठी भाषा, बोली भाषा याबद्दलची माहिती इंटरनेटवर शोधायला प्रोत्साहन मिळालं. फोनचा वापर उपयुक्त माहितीच्या शोधासाठी करण्याची गरज मुलांमध्ये निर्माण झाली.

नंतर वर्गात दर महिन्यात एक हस्तलिखित तयार करायचं ठरवलं. या उपक्रमामुळे मुलं लिहिती झाली. प्रत्येक महिन्यात विशेषांक काढले. कलर पेंन्सिल,रंगीत, कोरी पानं,स्केचपेन्स..असला किरकोळ खर्च माझ्यासाठी नगण्य होता.कारण मुलांच्या निर्मितीतून मिळणारा आनंद आणि समाधान फार मोठे होते. हस्तलिखित मुलांच्याच हस्ताक्षरात काढले. मुखपृष्ठासाठी स्माइल कॅान्टेस्ट घेऊन मुलांची निवड केली. मुलांना मंच आणि संधी मिळाली तर ती आत्मविश्वासानं उभी राहतात याचा अनुभव या उपक्रमातून आला.