मोबाइलवर फोटो काढा आणि निसर्गाला समजून घ्या! म्हणजे काय?

- उमेश घेवरीकर

(पद्मभूषण बाळासाहेब भारदे हायस्कूल, शेवगाव जि. अहमदनगर)

कोरोना संकट काळात शाळा बंद शिक्षण मात्र सुरु अशी परिस्थिती निर्माण झाली होती. मुलांचे ऑनलाइन शिक्षण सुरु झाले होते. पालक आणि शिक्षकांना कितीही धास्ती वाटत असली तरी प्रवाहाबरोबर चालत, नवे बदल स्वीकारत मुलांच्या हाती मोबाइल द्यावेच लागले. अर्थात त्याचे चांगले परिणामही दिसून आले. काही काळानं शाळा सुरु झाल्या तरी मुलांच्या हाती असलेला मोबाइल मात्र सुटला नाही. यावरून मग घरात, शाळांमध्ये संघर्ष सुरु झाला. मोबाइलचे शारीरिक, मानसिक दुष्परिणाम, नेट फिशिंग, ॲडिक्शन असे अनेक विषय ऐरणीवर आले. आमच्या शाळेतही म्हणजे पद्म भूषण बाळासाहेब भारदे हायस्कूल, शेवगाव या शाळेतही असे प्रसंग उभे राहू लागले. याच मोबाइलकडे अगदी मुलांचा शत्रू अशा दृष्टीकोनातून न पाहता त्याला सकारात्मकतेशी जोडून यातून काही विधायक करता येऊ शकेल का? असा विचार करून आम्ही ‘माय मोबाइल क्लिक’ हा उपक्रम मुलांसोबत राबवण्याचे ठरवले.