परीक्षा आहे तर टीव्ही बंद! आई-बाबा हा रुल का लावतात?

परीक्षा जवळ आल्या की आईबाबा पहिली शिकार करतात ती आपल्या युट्यूबची आणि टीव्हीची! परीक्षा जवळ आल्या की त्यांना लग्गेच आपला स्क्रीन टाइम टोचायला लागतो. “आधी तो टीव्ही बंद कर आणि अभ्यासाला बस!” रोज संध्याकाळी तेच ते! अरे काय आहे हे… परीक्षाच आहेत ना? मग ठीक आहे ना. एवढे पॅनिक कशाला होतात आईबाबा त्यावरून? आणि टीव्ही कशाला बंद करायचा? काही जणांच्या घरी तर चॅनल्सचे पैसे भरत नाहीत. वायफाय बंद करून ठेवतात. पण का?

थोडासा वेळ टीव्ही बघितला तर एवढा काय प्रॉब्लेम होतो? तर… थोडा वेळ टीव्ही बघितल्याने काही होत नाही. पण आपण काय थोडा वेळ टीव्ही बघतो का? “अर्धाच तास” म्हणून आपण एकदा टीव्ही सुरु केला की मग ‘अजून एक गाणं’, ‘एवढाच एपिसोड’ असं करत करत आपण खूप वेळ टीव्ही बघतो आणि मग अर्थातच आपला अभ्यास राहून जातो. म्हणून परीक्षा जवळ आली की आईबाबा टीव्ही बंद करा म्हणून ओरडतात.