मान लवचिक आणि मजबूत करण्यासाठी करा जिराफाचा व्यायाम!

प्राण्यांचे व्यायाम करायला, कश्शी भारी मजा येतेय की नाही? म्हणूनच गेले काही दिवस झाले, मी तुम्हाला प्राण्यांचे व्यायाम शिकवते आहे.आज आपण शिकणार आहोत, जिराफाचा व्यायाम. जिराफ खूप उंच असतो. जगात सध्या अस्तित्वात असलेल्या चतुष्पाद प्राण्यांमध्ये जिराफ सर्वांत उंच प्राणी तर आहेच, पण सर्वांत मोठा रवंथ करणारा प्राणीही आहे.

जिराफाचे बारकुडे वाटणारे पाय आणि मान यामुळे तो लुकडा-सुकडा वाटतो, पण जिराफाचं वजन किती असतं, तुम्हाला माहीत आहे?

या लुकड्या-काटकुळ्या वाटणाऱ्या जिराफाचं वजन तब्बल १२०० किलोपर्यंत असतं. आणि आपल्या या काटकुळ्या पायांनी एवढं वजन तो सहजपणे पेलतो.

तुम्हाला वाटत असेल, मग तोही हत्तीप्रमाणे हळूहळू पळत असेल. पण तीन हजार किलोचा हत्तीही वेळ आली की वेगात पळू शकतो आणि जिराफ तर ताशी तब्बल ५६ किलोमीटर वेगानं पळू शकतो. हा शाकाहारी लंबूटांग दिवसभरात केवळ दोन-अडीच तासच झोपतो आणि तेही उभ्या उभ्या.

जिराफ कायम मानेचा व्यायाम करत असतो आणि त्याची मान हेच जणू त्याचे हात असतात. हा लांबटांग्या आणि हाडूक उच्चा व्यायाम कसा करायचा ते आपण पाहू.