अभ्यासात ब्रेक हवाच! ब्रेक घेतल्याने म्हणे अभ्यास छान होतो. तो कसा?

तासनतास एका जागी बसून शिकणं हे जसं चुकीचं तसंच जागेवरुन न हलता सलग अभ्यास करणं हेही चुकीचंच. पण विहानच्या आईला हे कुठे माहित होतं. एकदा अभ्यासला बसलं की सगळ्या विषयांचा अभ्यास करुन मगच उठायचं. मग अभ्यासाला दोन तास लागू देत नाही तर चार तास. हा विहानच्या आईचा नियम होता. पण त्यामुळे विहान मात्र अभ्यास करताना कंटाळायचा. सोप्या गोष्टीही त्याला समजून घ्यायला अवघड जायच्या. रडत खडत अभ्यास पूर्ण करणाऱ्या विहानला अभ्यास करताना मजाच यायची नाही. तासनतास एका जागेवर बसून अभ्यास करणाऱ्या विहानचा गृहपाठ तर कसाबसा पूर्ण व्हायचा पण परीक्षेत मात्र विहानला कमी गुण पडायचे. विहानच्या बाबतीत हे असं का होतंय? हे विहानच्या आईला समजत नव्हतं. अभ्यास करताना विहानचं थकण्याचं, मलूल होण्याचा कारण म्हणजे विहानला अभ्यासात न मिळणारा ब्रेक. अभ्यास नीट व्हायचा असेलल तर अभ्यासात थोड्या थोड्या वेळाने छोटे ब्रेक घेणं गरजेचे असतं असं खुद्द अभ्यास विषयातले तज्ज्ञ देखील म्हणतात. चांगला अभ्यास होण्यासाठी अभ्यास आणि ब्रेक या दोन्ही गोष्टीत योग्य बॅॅलन्स होणं महत्त्वाचं असतं.