आमच्या शाळेत पर्यावरण पूरक जीवन जगायला प्रोत्साहन दिले जाते. विज्ञान विषय नुसताच पुस्तकातून न शिकवता प्रयोग करून, विविध वनस्पती बघून शिकवला जातो. सामान्य जीवनात केमिकल्सचा कमीत कमी वापर करणे, फटाके न फोडणे, कमीत कमी प्रदूषण करणे का आवश्यक आहे हे सांगितले जाते. शाळेतल्या ताई दादांची पर्यावरणपूरक जीवनशैली हे आमच्या डोळ्यांसमोर दिसणारे उदाहरण आहे. या सगळ्याचा परिणाम म्हणून मी माझ्या रोजच्या जीवनात पर्यावरणपूरक जगण्याची सुरुवात केली आहे. घराच्या साफसफाईसाठी आम्ही कमीत कमी केमिकल्सचा वापर करतो. वॉशिंगमशीन मधून कपडे धुऊन झाल्यानंतरचे पाणी आम्ही फरशी धुवायला वापरतो. घरी मागवलेल्या सामानाच्या पॅकिंगचा पुनर्वापर करतो. अशाच पॅकेजिंगमधून आलेल्या पुठ्ठ्यापासून तयार केलेला शूरॅक आम्ही वापरतो. बाकी पुठ्ठे गौरी गणपतीच्या काळात सजावटीसाठी वापरले जातात. आमच्या गणपतीचे मखर पर्यावरण पूरक असते. गच्चीवर आम्ही पर्यावरण पूरक बाग केली आहे. त्यामध्ये खरी माती वापरलेली नसून फक्त कुजलेल्या ओला कचरा आहे. त्यासाठी आमच्या गच्चीत खूप गांडूळे आणि किडे पण आहेत. त्यांच्यामुळे भरपूर पक्षी पण येतात. फुलांवर भरपूर मधमाशा, फुलपाखरे येतात. आम्ही कुजलेला सगळा कचरा गच्चीतल्या वाफ्यांमध्ये टाकतो. वाफ्यांमध्ये असलेल्या गांडूळांमुळे त्याची अजून छान भुसभुशीत माती तयार होते. गच्चीवरच्या बागेद्वारे आम्ही समाजापर्यंतही हा संदेश पोहोचवतो. याची पुढची पायरी म्हणून मी आईच्या मदतीने केमिकल फ्री साबण बनवते. माझ्या साबणामध्ये केमिकल्स नसून वेगवेगळ्या प्रकारची तेलं असतात. अशा प्रकारे तुम्ही पण जर पर्यावरण पूरक जीवनशैली अंगीकारलीत तर तुम्हालाच काय तर सगळ्या समाजालाच हळूहळू फायदा होईल.

- उर्वी सरिता साकेत गोसावी, विद्यार्थिनी.