गावातल्या शाळेत मुलं-मुली गिरवतात माॅडेलिंग आणि जाहिरातीचे धडे..

आनंद मिळावा आणि पुढच्या तासाला काय हा उत्साह वाढावा यासाठी शाळेत घेतला जातो कलारसास्वादाचा तास. आणि या तासाला मुलं एक वेगळ्याच जगात वावरत असतात.

भंडारा जिल्ह्यातील आसगाव म्हणजे चारपाच हजार लोकवस्तीचे गाव. ते गाव मला माझंच मूळ गाव वाटायचं. मुलांना पाठ्यपुस्तकातलं तर शिकवायचंच पण पाठ्यपुस्तकाच्या बाहेरच्या जगाचीही त्यांना ओळख व्हायला हवी. त्यासाठी त्यांनी नवनवे अनुभव घेवून पाहायला हवेत ही माझी एक शिक्ष्क म्हणून तळमळ असायची. आसगाव म्हणजे खेडेगावच. पण या गावातले मुलं मुली मात्र एकदम स्मार्ट, धडपडे, धाडसी आणि हुशार. जंगल परिसराशी त्यांची चांगली मैत्री . या मुलांना त्यांना माहीत नसलेल्या नव्या वाटांचा. माहीत नसलेल्या जगाचा परिचय करुन द्यावा हे सारखं मनात यायचं. नववीला कलारसास्वाद हा तास आमच्या शाळेत होता. हा तास मी घ्यायचे. 

 माध्यमं किती फास्ट झालीय.जग कुठल्या कुठे पोहचलंय. ही मुलं पण खूप पुढे निघून जातील.उद्योग व्यवसायात गुंततील. पण मुलींचं काय? हुशार, चुणचुणीत मुलींचं भवितव्य काय? या विचारानं मी फारच अस्वस्थ व्हायचे. दोन चार मुलींची लग्नं अकरावीतच ठरवली गेली. जीव कळवळला फार. किशोरी मंचाच्या किती तरी सभा घेतल्या शाळेत. तुम्ही कुठल्या कुठल्या क्षेत्रात जाऊ शकता हा आत्मविश्वास या मुलींना दिला. तुम्हीही माॅडेलिंग करु शकता असं त्यांना म्हटल्यावर त्यांच्या चेहेऱ्यावर शंका नाही तर उत्साह दिसला. पुढे भविष्यात त्यांना माॅडेलिंग करायचं असेल तर किमान प्राथमिक माहिती तरी त्यांना हवी म्हणून कलारसास्वादाला आम्ही माॅडेलिंग, जाहिरात करणे असा उपक्रम घ्यायचो.