मित्र-मैत्रिणींचा स्पर्श हवासा वाटतो पण आईची मीठी नकोशी होते. असं का?

स्पर्श महत्त्वाचा.. त्याला ओळखा!

तुम्हाला माहितेय? स्पर्श ही माणसाची एक गरज आहे. एखाद्या गोंडस मांजराच्या पिल्लाला उचलून घेतलं की किती छान वाटतं ना? किंवा खूप दिवसांनी भेटलेल्या मैत्रिणीला मिठी मारल्यावर? अशा वेळी तुमच्या मेंदूत चक्क काही रसायनं झरत असतात. त्यातलं मुख्य म्हणजे ऑक्सीटोसीन! आई बाळाला जवळ घेते तेव्हाही हेच रसायन झरतं. या ऑक्सीटोसीनमुळे मायेचे दुवे जोडले जातात. एकांतवासाची शिक्षा सगळ्यात भयानक समजली जाते, कारण तिथे कुणा माणसाशी संपर्कच होत नाही.

मोठं होताना काही स्पर्श नकोसे तर काही वेळा काही स्पर्श खूप हवेहवेसे वाटतात. तुमच्यातली हॉर्मोन्स तुमच्यातल्या या भावना जाग्या करतात. एखादी मुलगी प्रेमात पडते. कधीतरी चुकून मित्राचा स्पर्श होतो आणि मनात एकदम व्हायोलिन वाजायला लागतं. आता तो नुसता मायेचा स्पर्श राहात नाही, त्याला लैंगिक बाजू पण असते. काही वेळा ही ओढ इतकी जबरदस्त असते की आजूबाजूला कुणी नसेल तर तुमच्यातल्या एकाला अजून जवळचा स्पर्श करण्याची इच्छा होऊ शकते.