बांधकाम करताना भिंतीला पाणी का पाजावं लागतं? भिंत म्हणजे बाग आहे का?

निवान म्हणाला, 'आमच्या शाळेच्या वरती एक नवीन मजला बांधत आहेत. आणि आज आमच्या ताई आम्हाला तिथे घेऊन गेल्या होत्या..'

'तुम्ही कशाला तिकडे गेलात? तिकडे काय पाहायचं?' आजोबा वैतागून म्हणाले.

निवान म्हणाला, 'तिथे आम्ही एक विचित्र प्रकार पाहिला. ते पाहताना आम्हा मुलांची तर हसून हसून मुरकुंडी वळली.'

'म्हणजे काय झालं काय असं?'

'बारापैकी तीन वर्गखोल्या मस्त बांधून झाल्या आहेत. तर एक माणूस हातात पाइप घेऊन त्या मस्त गुळगुळीत भिंतींवर टूर्र टूर्र करुन पाणी उडवत होता. सगळ्या भिंती ओल्या आणि खाली सगळा चिखल. आणि तरीपण तो पाणी फवारतोच आहे.'

पदराला हात पुसत आजीने विचारलं, 'मग काय झालं?'

'अगं त्यावेळी दक्ष म्हणाला, ‘हे काय असे भिंतीला पाणी घालतात? भिंत म्हणजे काय बाग आहे का? की भितींच्या आत झाडं आहेत?’ हे ऐकताच आम्ही सगळे फसफसून हसू लागलो.'

'बरोबरच आहे त्या माणसाचं..' असं आजीने म्हणताच निवान किंचाळला, 'काऽऽय? भितींच्या आत झाडं असतात आणि ती पाणी पित असतात?'