अवघड गोष्टी शिकवण्यासाठी ‘सेल्फी विथ सक्सेसचा’ फंडा

एक अंकी संख्येपासून सुरू झालेला प्रवास अब्जापर्यंत सहजच सरावाने मुलांचा पाठ झाला. अंक लिहल्यावर उजवीकडून पहिली तीन घरं नंतर दोन दोनची घरं खुणा करायचेही मुलं शिकलीत. मग काय एकदा दोनदा पुन्हा पुन्हा सराव झाल्याने मुलांनी दणक्यात अब्जापर्यंत संख्याज्ञान आत्मसात केले.

    मुलांना आव्हान दिलं की ते वैयक्तिक अन सामुहिक पातळीवर ते पेलतात. त्यांना शिकण्यास प्रवृत्त केलं, थोडी कौतुकाची थाप पाठीवर दिली तर मुलं नैसर्गिकरित्या शिकण्याच्या प्रक्रियेत आपला सहभाग देतात. शिकवताना मुलांना बाह्यप्रेरणा देणं महत्त्वाचे आहेच पण त्यासोबतच त्यांच्यातली अंतप्रेरणा जागृत करणं फार महत्त्वाचे आहे.मुलांना निकोप स्पर्धा करायला नेहमी आवडते. त्यांना दिलेलं आव्हान त्यांनी पार पाडले. शिकवण्यात,शिकण्यात नाविन्यता असली तर करत असलेला बदल हा दोन्हीही बाजूने स्वीकारला जातो.